بسم الله الرحمن الرحيم
السلام عليكم
كل شخص منا اكيد مرت عليه فترة انه يبي يتغير للافضل
ويدخل عادات ايجابيه في نمط حياته .. و عادة تنجح و عادة للاسف تفشل
مثلاً انا اكبر مشكله اواجهها من كنت صغيره التسويف
وكان ينتج من التسويف تضييع الوقت وبالتالي ..
- قلت الانتاجيه
- قل تحقيق الاهداف
- بطئ في تطوير المهارات
حاولت بشتى الطرق اتغلب عليه من قراءة كتب او كتابه نوتات , او حتى منبه بوقت كل شي ابي اسويه ههههه،
ولا فاد! الغريب شي بسيييييط جاب مفعول على طول والسبب بذكره تحت
بس اول بذكر القاعده ، في شخص اسمه سعود الخميس قرر انه يبدا خطه سماها "خطة اربعين يوم"
الهدف منها انه يزيد انتاجيته ويكون عنده وقت اكثر ينبسط فيه بنفس الوقت
(تفاصيل الخطه اكثر في حساباته في انستقرام وتويتر وسناب)
انا بكتفي بذكر الشي البططططل البسيط اتمنى من كل قلبي يوصل لكل شخص ويجربه
راح يفرق كثير بيومه. اللي هو القاعده الذهبيه، اللي لو بس ما اعطانا الا هي كفت ووفت وزود
"ابدأ يومك بشي يسعدك، ابدأ اصعب مهمه بأول ساعه"
بهالبساطه !
لما بدأت يومي بشي يسعدني تأثير هالشي كان بأنه يفتح نفسي من الصبح ويخليني احس
بنشاط على طول ، مثلاً كنت افطر واروق بكوفي قبل اصحي ولدي وزوجي، او احط ميك اب خفيف
او كنت اشوف حسابات في السناب شات لاشخاص انبسط بسناباتهم
لاني غالباً انشغل لوقت متأخر، بس مو اندمج وانسى نفسي
طيب نجي لاصعب مهمه بآول ساعه وفي ايش كان تأثيرها
اصعب حاجتين بالنسبه لي وخصوصا اني في الغربه وما اعتمد على احد يساعدني
مسح الارضيات والكنس!! هههههه
فعلاً كانت تسوي لي مشكله، لأن من كثر ماهي ثقيله على نفسي كنت اشغل نفسي بأي شي
حتى لو سخيف عشان اتهرب منه وبالنهايه راح اسويه اسويه!
وغير عن اني طول الوقت احس بضغط وينشغل فكري فيها وانا اذاكر او اسوي اي شغله
كيف فرق معي هالشي؟ صرت اسوي الارضيات اول شي
بالتالي كنت احس براحه ومخي صافي اكثر صرت انجز اشغالي الثانيه بشكل اسسسسرع!
لان مافيه شي اتهرب منه ههههه. وبعد كذا يبقى عندي فراغ اسويه فيه اللي ابي
طبعاً بعد ما فرق معي هالشي البسيط
صرت ابتعد عن التسويف بكل شي يخص حياتي
والحمدلله الحمدلله الان انجز اكثر والقى وقت انمي في هواياتي اكثر من اول بكثير
وغير عن كذا قل التوتر وذهني دائماً صافي ومركز على اهدافي
وكل شخص يقيس على حياته باصعب شي عنده ويشوف النتيجه
بالتوفيق
موضوع حلو مرره وللاسف بالنسبة لي صعب أبدا بكوي الملابس أكره شي ممكن أسويه ودايم أتهرب منه ..
ReplyDeleteطيب لو كان صعب تبدأين فيه اول شي، فكري بحلول ثانيه تخليك تخلصين هالمهمه وترتاحين.
Deleteلما يكون عقلك صافي من الضغوط يعطيك مجال تبدعين اكثر وتنبسطين بيومك اكثر
مثلاً حل : وزعي الايام على كوي الملابس، يوم اكوي ملون ويوم ابيض / او يوم تيشيرتات ويوم شي اخر
تكون الكميه بسيطه واسهل عليك
برضو استغلي الكي انك تسوين شي ثاني معه
تفرجي مسلسل ممتع، تابعي فيديوز لاشخاص ملهمين، اسمعي مقاطع انقلش
تتسلين وما تحسين بالوقت والحلو بعد مرور الوقت بتلاحظين مهاراتك صارت افضل بدون بذل جهد متعب او مستقل
حياك الله ايمان